WIEL span reeds vir jare die wêreldbekende, akkurate en robuuste VBOX GPS-stelsel vir al ons verrigtingstoetse in, nes die ander tydskrifte in die Ramsay Automotive-stal, CAR en Leisure Wheels.

Die oorspronklike stelsel wat aangeskaf is, die VBOX II, kon tot tien satelliete heeltyd volg teen 'n proeftempo van 20 Hertz of 20 maal per sekonde. Hierdie hoë proeftempo is veral voordelig met remtoetse, wat vanaf 100 km/h geskied en dikwels minder as drie sekondes duur. Dié toetse kan afgelê word deur 'n sneller op die rempedaal te plaas, of die meting te begin wanneer die snelheid onder 100 km/h daal. Die stelsel skakel die bestuurder se reaksietyd uit deur remming reeds vanaf 100,5 km/h of 101 km/h te bewerkstellig.

Verbysteekversnelling monitor die verandering in tyd oor elke snelheidsegment (byvoorbeeld tussen 40 km/h en 60 km/h, ens.), terwyl die versnelling tot een kilometer die tyd wat verval meet in elke 20 km/h-strek. Snelheidsmeter-kalibrering vergelyk weer die motor se snelheidsmeter-lesing met die VBOX-lesing, en die 10 km-afstandlesing op die motor se odometer vergeleke met die VBOX se meting. Of 'n herlaaibare 12 V-battery, of die motor se kragsok verskaf krag, en die magnetiese antenna word aan die motor se dak vasgemaak vir 'n duidelike kanaal na die satelliete.

Ons gaan alle toetse deeglik op 'n skootrekenaar na om te verseker dat die beste tegniek gebruik word om die meeste uit toetsmotors te haal, maar die aanboord-geheue stoor steeds elke resultaat, asook die hoogte bo seevlak en die hoeveelheid satelliete in sig. Die VBOX-stelsel het dus aanhoudende kennis van waar die motor elke 20ste van 'n sekonde is, terwyl dit versneldata bepaal deur die tempo van verandering van afstand teenoor tyd. Laterale en oorlangsversnelling (g) word ook bereken.

Die plaaslike invoerder en verskaffer het aan ons die VIDEO VBOX verskaf. Hierdie stelsel gebruik 'n 10 Hz-verwerker en sluit twee kompakte kameras met mikrofone in, asook 'n aanpasbare skerm met die opsie om renbane, verrigting, remwerk, laterale g-krag-grafieke en maatskappy-logo's op te stel. Enjinomwentelinge en ander data kan ook via die motor se aanboord diagnostiese stelsel afgelaai word. Dit is hierdie VIDEO VBOX wat WIEL gebruik vir die baantye wat ons op die webwerf en in die tydskrif publiseer.

Kyk uit vir binnemotor-video's van ons toetsmotors onder die video-afdeling. Vir meer inligting rakende die VBOX, gaan na Racelogic se webtuiste by www.racelogic.co.uk.