Dit is maar ‘n frustrerende besigheid, om ʼn enjin eers te laat inloop. Maar dit is nou hoe ons die Locost vir eers moet bestuur. Ons laat loop hom nie nou bo 6 000 r/min nie, en meestal wissel ons maar ratte tussen 4 000 r/min en 5 000 r/min. Dit is wel heerlik om na al die afwagting mens valhelm op te sit, die viergordel-harnes vas te kliek en die knoppie te druk wat die enjin aanskakel. Om so na aan die pad te sit bring ook talle ander ervaringe vir die bestuurder.

Verbeteringe

Daar was talle dingetjies wat aangepas en verander moes word voordat ons die motor op die pad kon neem. Die stuurwiel is sowat 120 mm nader aan die bestuurder gebring deur ‘n verlenging in te bou en die voetpedale is reg opgestel. Verder is die rathefboom ook nader aan die bestuurder geskuif. Die effek van hierdie twee verskuiwings is dat die bestuursposie nou basies perfek is.

Ure voordat ons die motor by Craig Harper (eienaar van Harper Sportscars, wat die Locost voltooi het nadat ons voormalige tegniese redakteur die grootste deel van die werk gedoen het) gaan optel het, het een van die oliepype gebars. Dit blyk toe dat die druk wat die pype kan hanteer slegs 3 bar is, terwyl die Locost byna 6 bar druk op die stelsel sit. Beter pype is gekoop en al die oliepype is vervang. ‘n Versterking is ook op die voorste modderskermings ingebou.

Sagteware

Die volgende stappie was om die programmering van die enjin reg te kry. ‘n Basiese map is opgelaai en die Locost loop nou goed, behalwe vir ‘n area net bo luier wat hy sukkel. Sodra die Locost deur die hele lisensiëring en registrasie proses is (hierdie woorde is nou al vloekwoorde in die kantoor as gevolg van die patetiese stelsel en hulp van die Polisie en Verkeersdepartement) gaan ons die Locost op ‘n rollende pad plaas en sorg dat die kundiges alles regstel en ook kyk hoeveel kilowatt en newtonmeter die enjin lewer.

Battery

Vir beter massaverspreiding is die battery lekker laag in die onderstel geplaas. Dit gaan wel bitter moeilik wees om hom uit te haal as iets so fout gaan, maar vir nou gaan die Locost gereeld loop en ons wil in ieder geval in die toekoms die huidige battery met ʼn kleiner een vervang.

*Daar was ‘n lang stilte oor WIEL se projek motor, maar kyk nou uit vir gereelde nuus.

*Lees ‘n meer volledige artikel in die Januarie uitgawe van WIEL.