Geen ander akteur het so ʼn sukses van beide hul akteurloopbaan en renloopbaan gemaak soos Paul Newman nie. Na Newman se afsterwe in 2008 is ʼn hele paar boeke gepubliseer oor sy lewe. Hierdie boek fokus groot en deels op sy passie vir motorsport.

Paul Newman se talent as akteur is nie eers debatteerbaar nie. Hy is eenvoudig een van die beste akteurs van sy tyd en vir filmliefhebbers wat nog nie flieks soos Butch Cassidy and the Sundance Kid of Sting gesien het, mis regtig uit.

Newman het altyd ʼn belangstelling in motors getoon, maar sy belangstelling vir motorsport het eers later begin tydens sy rol in die fliek Winning wat in 1968 geskiet is. Hierdie fliek fokus op die lewe van ʼn renjaer, Frank Capau, wat Newman vertolk het.

Dit het ʼn ware geïnteresseerdheid vir die renbaan en renmotors in hom opgewakker en Newman het geleidelik al hoe meer aan wedrenne begin deelneem en ook redelike sukses behaal. Hoewel hy nooit in aan ʼn Indy 500- of Formule 1-wedren deelgeneem het nie, het hy redelike sukses (wat insluit ʼn paar podiumplekke en oorwinnings) in Trans-Am, IMSA Sprint Races, Can-Am asook ʼn hele paar uithouwedrenne gehad.

Soveel verskillende wedrenne het natuurlik ook bygedra dat Newman agter die stuur van ʼn hele paar renmotors gekom het. Die boek is belaai met inligting oor al die wedrenne en mense wat hy in kontak mee gekom het met net soveel akkommoderende foto’s van die begin tot die einde van sy renloopbaan.

Interessant genoeg was die laaste fliek waaraan Newman deelgeneem het die Pixar tekenfilm Cars waar hy die rol van die Doc Hudson (ʼn Hudson motor) vertolk het. Hierdie fliek het ook oor motors en die wedrenwêreld gedraai.

Die boek is te koop by loot.co.za vir R266.

Besonderhede:

Titel: Winning – The Racing Life of Paul Newman

Outeur: Matt Stone

ISBN: 978-0-7603-3706-6

Prys: R266 (aflewering gratis)